« Էլի մութ գիշեր… » (նվիրված է)

Գարնան անո՜ւշ գիշերվա մեջ ես այսօր,
Քո պատկերը աստղիկներով գծեցի,
Լույսնի լույսը տարածեցի՛ շուրջ բոլոր,
Ու կարոտով բաց երկնի տակ նստեցի։

Հետո մի մեծ ամպի ծվեն պոկեցի՛,
Եվ զուգեցի՜ ես վարսերդ սևաթել,
Ու որ լինեիր է՛լ ավելի գեղեցիկ՝
Ծիր կաթինն էի քո ուսերին փաթաթել։

Կոր լուսինը ես մտովի՛ շրջեցի,
Կառուցեցի՜ քո շուրթերը ժպտացող,
Եվ մեղմ քամու հոսանքի հետ ցրեցի,
Սև ամպերը քո աչքերին մոտեցող։

Հմայվեցի՜  ես քո տեսքով լուսերես,
Անիրական քո պատկերով շողարձակ,
Այսպես սիրով հորինեցի սեր իմ քեզ,
Ու տենչացի՜, ու թախծեցի՜ համարձակ։

Հեղ.՝ Սևակ Բայրամյան